Snjóflóðasamtök Íslands standa fyrir ráðstefnu um snjóflóðamál þann 10. október 2024 í húsi Verkís, Ofanleiti 2, Reykjavík. Ráðstefnan er opin öllum áhugasömum og er viðfangsefnið valið sérstaklega til þess að höfða til breiðs hóps af áhugafólki og fagfólki.
Þema þessarar fyrstu ráðstefnu Snjóflóðasamtakanna er “snjóflóð af mannavöldum” og verða áherslur ráðstefnunnar eftirfarandi:
1. Mat á snjóflóðahættu: Hvernig snjóflóðahætta er metin af mismunandi aðilum. Hér getur áherslan verið allt frá svæðisbundinni snjóflóðaspá Veðurstofunnar að mati á snjóflóðaaðstæðum á skíðasvæðum eða leiðarvali leiðsögumanna og einstaklinga í snjóflóðalandslagi.
2. Mannlegi þátturinn: Snjóflóð af mannavöldum eru alltaf samspil mannlegra þátta og snjóaðstæðna. Hér er áherslan á það sem snýr að mannlega þættinum. Hvernig eru ákvarðanir teknar og hvað hefur áhrif á þær?
3. Snjóflóðaatvik: Það er mikilvægt að læra af þeim atvikum sem koma upp, hvort sem það eru slys eða atvik þar sem hefði getað orðið slys. Hvatt er til þess að fólk deili reynslu sinni af snjóflóðum af mannavöldum. Einnig er óskað eftir erindum um viðbragð og björgun í snjóflóðaslysum í óbyggðum.
4. Snjóalög og vísindi: Hér er áherslan á myndun óstöðugra snjóalaga og varðveislu veikleika í snjónum.
Óskað er eftir tillögum um erindi og rennur fresturinn út þann 15. september.
Ráðstefnugjald:
Ókeypis fyrir fyrirlesara.
2000 kr. fyrir félaga og nema.
5000 kr. fyrir aðra.
Skráning fer fram hér: https://forms.gle/XL3ZG54TxGNF7x9P7
