LÖG SNJÓFLÓÐASAMTAKA ÍSLANDS
2 útgáfa – Samþykkt á Aðalfundi 7. Nóvember 2024.
1. grein Heiti og lögheimili
Félagið heitir Snjóflóðasamtök Íslands (SNÍS). Á ensku heitir félagið Icelandic Avalanche
Association. Heimili þess og varnarþing er í Reykjavík.
2. grein Markmið
Markmið félagsins eru að
● efla samstarf aðila sem koma að snjóflóðamálum á Íslandi
● skapa vettvang fyrir sérfræðinga í snjóflóðafræðum, rannsóknum, forvörnum og viðbragði, til að deila þekkingu og upplýsingum sín á milli og til almennings
● auka þekkingu fagaðila og almennings um snjóflóð og stuðla að framþróun
● halda fræðandi viðburði opna almenningi og eina ráðstefnu ár hvert
3. grein Aðildgrein
3.1. Tegundir aðildar
Snjóflóðasamtök Íslands eru með eftirfarandi tegundir aðildar:
1. Almenna félaga
2. Stuðningsfélaga
3. Námsfélaga
Sækja þarf um aðild og tekur stjórn afstöðu til umsókna, þ.e. samþykkir eða hafnar. Einungis almennir félagar hafa atkvæðisrétt á aðalfundi og geta gegnt stjórnarstörfum.
3.2. Almennir félagar
Einstaklingar sem starfa við snjóflóðatengd málefni, s.s. forvarnir, rannsóknir, vöktun, eftirlit, viðbrögð eða leiðsögn, í launuðu starfi eða sjálfboðastarfi, og uppfylla eitthvað af eftirfarandi geta verið almennir félagar:
A. Starfa að staðaldri við snjóflóðatengd mál.
B. Starfa við snjóflóðatengd mál að minnsta kosti 5 daga á ári og hafa lokið að minnsta kosti 5 daga snjóflóðanámskeiði.
C. Önnur viðeigandi reynsla/hlutverk. Hér er þörf á frekari rökstuðningi af hverju viðkomandi á erindi í félagið.
3.3. Stuðningsfélagar
Stofnanir, fyrirtæki, samtök eða einstaklingar sem vilja styðja starfsemi snjóflóðasamtakanna, fjárhagslega eða á annan hátt, geta verið stuðningsfélagar. Stuðningsfélagar hafa engar skyldur eða réttindi (svo sem atkvæðisrétt) nema það að styðja starfið á þann hátt sem um er samið.
3.4. Námsfélagi
Námsfélagar geta þau verið sem vinna að bakkalár-, meistararitgerð eða öðru stóru
nemendaverkefni sem tengist snjóflóðum. Nemendaaðild er ókeypis en veitir ekki atkvæðisrétt á
aðalfundi.
3.5. Brottrekstrarákvæði
Stjórn getur vikið félaga úr samtökunum, tímabundið eða fyrir fullt og allt, fyrir þessar sakir:
A. Einelti, ofbeldi eða áreitni.
B. Spillir orðspori félagsins, með framferði sínu innan eða utan félagsstarfsins.
C. Vinnur gegn markmiðum félagsins.
D. Borgar ekki árgjald 2 ár í röð
4. grein Skyldur félaga
Félagsfólk skal tjá sig á faglegum og hlutlægum grundvelli, vinna í samræmi við markmið
félagsins og bera virðingu hvert fyrir öðru.
5. grein Skipulag
Stjórn félagsins skipa 5 aðalmenn, þ.e. formaður, varaformaður, ritari, gjaldkeri og einn
meðstjórnandi, auk 2 varamanna.
Formaður skal kosinn sérstaklega til 1 árs í senn. Aðrir stjórnarmenn skulu kosnir til 2 ára í senn og ganga tveir þeirra úr stjórn ár hvert, en endurkjör er heimilt. Það sama gildir um varamenn.
Stjórn skal kosin skriflega ef fleiri eru í kjöri en kjósa á. Stjórn skiptir með sér verkum og skipar í ráð og nefndir eftir þörfum. Með prókúru félagsins fara gjaldkeri og formaður.
Kosnir skulu tveir skoðunarmenn reikninga til eins árs í senn. Reikningsár félagsins er frá 1.
september – 30. ágúst.
6. grein Stjórnarfundir
Stjórnarfundi skal halda svo oft sem þurfa þykir, þó eigi sjaldnar en einu sinni í mánuði á
tímabilinu frá 1. september til 31. maí og ennfremur ef þrír aðalstjórnarmenn óska þess.
Varamenn skal að jafnaði boða á stjórnarfundi. Stjórnarfundur er löglegur ef þrír aðalmenn sitja hann, enda hafi allir aðalmenn verið boðaðir. Á lögmætum stjórnarfundi ræður afl atkvæða um þær ákvarðanir sem teknar eru. Falli atkvæði jafnt skal atkvæði formanns ráða.
7. grein Aðalfundur
Aðalfundur er æðsta vald félagsins og skal haldinn á tímabilinu 1. október – 15. nóvember ár hvert. Atkvæðisrétt á aðalfundi hafa þeir almennu félagar sem greitt hafa árgjald liðins árs.
Meirihluti atkvæða ræður úrslitum nema annað sé tekið fram í lögum. Aðalfundur skal boðaður með dagskrá sem send er rafrænt á skráða félaga að minnsta kosti 10 almanaksdögum fyrir aðalfund og er hann þá lögmætur, ef löglega er til hans boðað.
Dagskrá aðalfundar er sem hér segir:
1. Kosning fundarstjóra og fundarritara.
2. Flutt skýrsla stjórnar um starfsemi félagsins.
3. Skoðaður ársreikningur félagsins lagður fram til samþykktar.
4. Lagabreytingar.
5. Kosning stjórnar samkvæmt 5. grein laga.
6. Kosning skoðunarmanna reikninga.
7. Önnur mál.
Atkvæðisbærir félagsmenn geta veitt öðrum félagsmönnum umboð til atkvæðagreiðslu í sínu nafni. Skal umboðið vera skriflegt og berast fundarstjóra í upphafi fundar. Enginn getur þó farið með umboð fleiri en eins manns. Umboð til atkvæðagreiðslu gildir einungis til greiðslu atkvæðis um þau málefni sem kynnt voru félagsmönnum með réttmætum hætti minnst viku fyrir aðalfund.
8. grein Lagabreytingar
Tillögur til lagabreytinga verða að hafa borist stjórn félagsins 15. september og skulu þær birtar í aðalfundarboði. Einungis aðalfundur getur breytt lögum þessum og þarf til þess 2/3 hluta greiddra atkvæða.
9. grein Félagsgjöld
Félagsgjöld eru ákveðin á aðalfundi. Tímabil árgjalds er frá upphafi aðalfundar að upphafi næsta aðalfundar. Atkvæðisbær og kjörgeng eru þau sem greitt hafa árgjald síðastliðins árs fyrir upphaf aðalfundar.
10. grein Slit félagsins
Eigi má slíta félaginu, nema það verði samþykkt á tveimur lögmætum fundum í félaginu, sem haldnir eru með minnst mánaðar millibili. Skulu þeir boðaðir á sama hátt og aðalfundur og fundarefni skýrt tekið fram í fundarboði. Verði félaginu slitið skulu skjöl þess, lausafjármunir og aðrar eignir renna til þeirra góðgerðarmála sem ákveðin verða á slitafundi.